Брза Шварцвалд Торта без Печење: Десерт за Потполно Уживање

Оваа брза Шварцвалд торта без печење е поедноставна верзија на оригиналната Шварцвалд торта, а сепак исто толку сочна и ќе ве воодушеви.

Совршен избор за летниот период; нема потреба да поминувате часови пред топлата рерна за да ја подготвите. Напротив, за многу кратко ќе имате извонреден десерт во кој сите ќе уживаат.

Може да биде и одличен избор за роденденска торта или пак за некој друг посебен момент. Ми се допадна најмногу што е совршено избалансирано благото од бисквит подлогата и киселото од вишните. Секој залак се топи во уста и ве освежува.

Не е воопшто ,,тежок” десерт и топло ви го препорачувам, особено ако веќе сте обожавател на безвременската шварцвалд тортата. Препознатлив десерт кој привлекува и со изгледот и со вкусот!

Брза Шварцвалд Торта без Печење Рецепт

Подлога:

300 гр мелени бисквити или Плазма

100 гр мелени ореви

125 гр путер несолен, растопен

100 мл млеко

50 гр чоколадо за готвење, истопено

Подготовка:

Измешајте заедно убаво и префрлете во тава со обрач број 24 или 26. Израмнете убаво.

За филот со вишни:

300 гр вишни

100 гр вода

3 лажици шеќер

Посебно изматени:

2 лажици густин во малку вода

Вишните ги ставате со водата и шеќерот да зовријат. Додајте го и густинот. Гответе околу 2,3 минути да добиете густ фил.

Додека е топло, го нанесувате врз подлогата. Оставете да се олади.

За филот со крем сирење:

500 гр маскарпоне или друго крем сирење

100 гр шеќер во прав

Изматете го со миксер, 2 до 3 минути. Додајте 300 гр слатка павлака. Матете уште 2, 3 минути. Можете, но и не мора да додадете 1 кесичка желатин подготвeн според упатство.

Ставете го врз оладениот фил од вишни. Израмнете убаво и покривате со ганаш крем.

За да го подготвите, потребно ви е:

200 гр слатка павлака

200 гр чоколадо за готвење

Загревате на топло, но не треба да зоврие. Полијте ја тортата со ганашот и декорирајте и сечете по желба!

На здравје!

Си одите веќе?-Нема проблем! Можеме да се дружиме и да споделуваме рецепти и на социјалните мрежи! Следете ме на инстаграм за уште многу прекрасни рецепти gotvimesojadranka и придружете се на мојата ФБ група Gotvime so Jadranka која веќе брои 8500+ членови кои споделуваат извонредни рецепти!

Leave a Reply

Your email address will not be published.